أحلام الفقراء
--------------------------------------------------------------------------------
وقف المذيع بشكل بديع
يسأل فقير تتمنى اية
نظر لة الفقير بخوف
وخاف يرد علية
قال لة طفى الكاميرا
وأقولك أحلامى يا بية
نفسى فى هدمة نضيفة
تستر عورتى
ورغيف نضيف أكلة
ما يشوكش جتتى
ومية نضيفة أشربها
ماتسودش سحنتى
وعلاج لقلبى وسكرى
يرد لى صحتى
والحكومة تدينى ترخيص
بكشك لأسرتى
والمجارى الضاربة ياسيد نا
تتصلح فى حتتى
وفاعل خير طيب
يشترى منى كليتى
علشان أشترى بيها
كلية لبنتى ووردتى
وابنى اللى عجزة مستهتر
فى حادث حطم مهجتى
يملك كرسى للعجزة
وبضحكتة تترد ضحكتى
ولما الموت يحصدنى
الاقى تربة لجتتى
معلش أنا طمعت كتير
قالها ودمعة فى عينية
ومشى وسط الزحام
حزين يجر رجلية
ـــــــــــــــــــــــــــــــــــ
بقلم:
الجينرال
موضوع: أحلام الفقراء !!! 
